Bagk oetlaote: 79 DAGEN

Kleindererre Covid-11: test negatief, deenk positief!

Segietere, 11 oktober 2020
Kleindererre Covid-11: test negatief, deenk positief!

D’r 11de van d’r 11de kump korterbie. De harte kleure langzem roed, gael en greun en de Vastelaovend kump wir ‘t liëve binne van edere carnavalist oet Segietere. Aog diet jaor.

Nao aanleiding van de afgekondige en geldende raegels roondum Covid-19, euverliegke mit d’r burgemaester, berichgiëving in versjillende media en vuural de groëte oonzekerhaed kieke viër oet nao ’n biezeunder sezoen in ‘t Kleindererreriek. De Vastelaovend in Segietere is ’n traditie, dao kint geng striep door. Al wurd ‘t diet jaor wal andersj. Geng Zitting, gaene nujje Kleindererrepreens, gaene Optoch door de sjtraote en gaen groet fête. ’t Is wie ‘t is, aog vuur de Kleindererre.

Belaove kin v’r in dieze oonziëkere tied nieks, meh os unieke en creatieve talinte ienzitte vuur de Vastelaovend in Segietere kin v’r wal. En dat gunt viër aog doen. Vanaf d’r 11de van d’r 11de deenke viër dan aog volges de richlijne van Covid 11: test negatief, deenk positief! V’r deenke in kanse, in wat wal nog allemaol kint, en vuural in aw kloete! Wie? Laot euch verrasse! Heb d’r ideeje? Laot ‘t os ziëker waete! Diër kint os bereike via cvdekleindererre@gmail.com.

Mit creatief versjtand en volges protocol beeje v’r aog ’t koëmend sezoen de Vastelaovend in os dörp aan. Uniek, biezeunder en apart. Andersj dus. Mit respect en mit good fatsoen. Want zegk noe zelf: nieks is toch zoe sjoen.